II. ATALBURUA.
Udal-baimenak.

14. Atala. Baimenak doakionak eskatu ondoren emango dira. Eskabidea Udaleko Alkatetzara bidaliko da, eta bertan honako hauek adieraziko dira:

a) Eskabide-egilearen izen-abizenak edo bere kasuan, egoitza.
b) NAN edo ANA eta IFZren zenbakia, lege nortasuna dutenen kasuan.
c) Helbidea.
d) Instalazioari eta salgaiei buruzko azalpena.
e) Lege nortasuna dutenen kasuan, jarriko da baita ere baimena erakundearen kontura erabiliko duen langilearen edo kidearen izena, egoitza eta N.A.N.
f) Lekua, eguna eta orduak, eta hala badagokio, maiztasun eta kokapen finkoko zein merkaturako eskatzen den baimena.
g) Zenbat metro hartuko dituen instalazioak.

15. Atala. Aurreko atalak aipatzen duen eskabideaz gain, eskabide-egileak agiri hauek ere ekarri beharko ditu:

a) NAN, ANA eta IFZren fotokopia, hala balegokio. Atzerritarrek beregaineko lan-baimenaren eta egoitza-baimenaren fotokopia, edota egoitza izateko eta lan egiteko gaitasuna ematen dien beste edozein agiri.
b) Gizarte Segurantzako kotizazioen alta eta azkeneko ordainagiria.
c) Ekonomia Ihardueren gaineko Zergaren alta eta azkeneko ordainagiria.
d) Lege nortasuna dutenen kasuan, enpresa eraketaren agiria, Merkatal Erroldan behar bezala izena eman ondoren, hala behar izanez.
Eraberean, ordezkaritza baliotu egin beharko da zuzenbidearen aldetik indarra duen edozein baliabidez edota, eskaera egileak berak deklarazioa eginez.
e) Janari-edariei dagokienez, janari erabiltzailearen-txartela.
f) Iharduera horretarako langilerik izanez gero, lan-harremana egiaztatzen duten agiriak ere ekarri beharko dira.
g) Jabearen izenean iharduera hori gauzatzeko baimena dutenen nortasuna egiaztatzen duten agiriak.

III. ATALBURUA.
Ihardunbidea.

16.Atala. Eskabidea eta dagozkion agiriak jaso ondoren, udaleko organo eskudunak agiri horiek eta gainerako txostenak aztertuko ditu, eta baimena eman edo ukatu erabakiko du.

17. Atala. Edonola ere, janari-edariak kaleetan saltzeko baimena emateko, agintaritza eskudunaren baietza beharko da.

18. Atala. Udalaren baimenak nahitaez honako hauek jasoko ditu:

- Baimenaren jabearen eta haren izenean iharduera gauzatzeko baimenduta   dagoenaren edo daudenen izen-abizenak.
- Kokapen eta maiztasun finkoko merkatuko saltokiaren zenbakia edo, bestela,   iharduera zein tokitan gauzatu daitekeen.
- Baimendutako produktuak.
- Iharduera gauzatzeko egunak eta ordutegia.
- Beteko den azalera.
- Instalazioaren ezaugarriak.

19. Atala. Baimendutako saltzaile guztiei nortasun-txartela emango zaie, eta bertan honako hauek agertuko dira:

- Jabearen eta baimendutako pertsonen (horrelakorik badago) identifikazioa.
- Salmenta-baimenaren iraupen-aldia.
- Baimendutako produktuak.
- Kokapen eta maiztasun finkoko merkatua bada, saltokiaren zenbakia, edo   bestela, iharduera zein tokitan, egunetan eta ordutan gauzatu daitekeen.

Nortasun-txartel hori, beti ere, eskatzen duten udaleko agintaritzaren eskuetan egongo da.

20. Atala. Baimena aukerakoak izango dira eta, beraz, udalak ezeztatu ahal izango ditu, baimena emateko arrazoiak desagertu direla uste badu eta ordenantza hau eta arau ezargarriak betetzen ez badira. Baimena ezeztatzeak ez du kalte-ordaina hartzeko eskubiderik sortuko.

Saltzaile berari, epealdi baten barruan, ezingo zaio eman kaleko salmenta gauzatzeko baimen bat baino gehiago.

21. Atala. Udalerrian bertan egoitza duten merkatariek lehentasuna izango dute baimenak esleitzen direnean.

22. Atala. Maiztasun eta kokapen finkoko merkatuetan urtean zehar hutsik geratzen diren saltokiak, bestalde, baldintza guztiak bete arren aurretik baimenik lortu ez zuten eskabide-egileen artean esleituko dira. Kasu horietan, eskabidearen antzinatasuna hartuko da kontuan. Hutsik geratzen diren saltokietan baimendunik badago, lehentasuna izango dute saltokiaren esleipenean.