III. titulua: BAIMENTZEKO PROZEDURA

10. artiulua.- Ordenantza honek aipatzen dituen larratzeko eskaerak larratu aurreko urteko urriaren 15a baino lehen egin behar dira Udal Erregistroan eta eskaeretan adierazi behar da, espezien arabera, zenbat buru larratu nahi den. Eskaera orriarekin batera abere bakoitzaren jabearen eta identitatearen ziurtagiri egiaztagarriak aurkeztu behar dira eta eskatzen diren osasun betebeharrak betetzen direla ere egiaztatu.
Horiez gain, larratzeko baimena emateko beharrezko derizkion datu osagarriak eska ditzeke Udalak.

11. artikulua.- Eskaerak, egin beharreko kontsiderazio, erregulazio eta/edo mugegetekin batera, Larreak Ustiatzeko Urteko Planean sartu eta Gipuzkoako Foru Aldundiko Mendi Zuzendaritzara bidali behar dira, onar ditzan.
Tramite hori bete ondoren, eskaera bakoitzaren behin-behineko ebazpena jakinaraziko die Udalak eskatzaileei. Eskaera hori behin betikoa izango da eskatzaileak ezarrita dauden udal tasak, baimendutako abereen kopuruari bakarrik dagozkionak, ordaintzen dituenean.

12. artikulua.- Larreak preferenteki herriko abeltzainentzat izango dira. Udalak antola ditzake ustiapen horiek ondoko irizpide hauei jarraituz:

1) Larreratzeko baimenak, hasiera batean, I. tituluko 2. artikuluaren barruan egon eta AGAUTZko larreak, eraldatu eta hobetzeko lanen hasieratik, antolamendu baten barruan, ustiatzen ibili direnei emango zaizkie.

2) Baimen horiek beste ustiapen batzuekin bat etorriko liratekeenean, larratzeko baimena eman daiteke Ataungo auzotarrei edota udalerriko ustialeku edo etxaldeen jabeei aurreko apartaduan ez badaude sartuta.

3) Mendiaren baliabide naturalak gutxitzeko arriskurik gabe, oraindik beste larratze batzuk ere baimentzeko aukera badago, larratzeko baimena eman dezake Udalak Ataunen bizi ez arren eskaera egin duten abeltzainei.
Udalak eman ditzake baimenak denbora, espazio edo abelburu kopuruari begiratuta. Aurreko apartaduetako edozeinen barruan, gertatzen bada larre eskaerek mendiaren ustiapen normala gainditu egiten dutela, Udalak abelburuen kopuruaren arabera eman ditzake baimenak.

13. artikulua.- Ataungo Udalak emandako larratzeko baimenak urtebeterako izango dira, hau da, eskaera aurkeztutako egunaren ondoko urte natural osorako. Baimena ematen den kasuetan zigilu edo identifikatzeko udal adierazle batez markatu behar dira abereak.

14. artikulua.- Egin behar duten ustiapenaren ordain gisa, abelburuko (edo artaldeko) abeltzainek ordaindu behar dituzten gutxieneko kuotak jarriko ditu Udalak. Hasiera batean Udalak jarriko dituen kuotak larre horiek zaintzeak (ustiatzearen ondorioz) ekarriko dituen gastuak ordaintzeko izango dira.