Joxemiel Barandiaranen erbeste garratza gozotu zuen lapurtar herriari esker onez...
San Martin eta San Gregorio auzoak lotzen dituen Herribide Zaharrak herri honen hainbat sekretutxo erakutsiko dizu ingurune natural eta lasai batean paseatzen zabiltzan bitartean.
San Martingo plaza abiapuntu izanda, bertan dituzu ikusgai udaletxe sarrerako ESKULTURA, herriko seme kuttun den JOXEMIEL BARANDIARAN, gizaki eta fededuna, irudikatzen duena, euskal nortasun eta kulturaren alde hainbeste lan egin zuen antropologo eta etnografo unibertsal honen presentzia gure artean betirako iraunaraziz; elizako ORGANO BARROKOA, 1761 urtekoa, Gipuzkoan bere estiloko onenetarikoa eta bakarrenetakoa izateagatik, gure mugaz gaindiko ospea irabazi duena.

Aurrerago aurkituko dituzu OLALUZEAGAKO KAROBIZULOA, “industria zahar” baten, karegintzaren, eredu erakusgarria, Ataunen gutxienez 500 urteko bizia izan duen langintza honen aztarna leiala; PERUNEZARRE eta SARA, Joxemiel Barandiaranen jaiotetxea bata, erbeste ondorengo bere bizitokia bestea (Iparraldeko herriaren izena eta izana hartu zituena oroigarri gisa); bidean zehar, belar sortak goiko belardietatik baserrietaraino jaisteko KABLE ETA TXIRRIKA MEKANISMO BITXIA, balio etnografiko handiko altxorra, Euskal Herrian ia erabat galduta egon arren, gurean oraindik irauten duena;



ZELABEAR DORRETXEA, XVI. mendeko etxe dotorea; ERROTA eta ERROTATXO, ur isuri berak bata, lehenik eta bestea jarraian martxan jartzen zituenak...
S.Gregorioko eliza ondoan, Jon Iturrarte eskulturgileak Joxemiel Barandiarani eskeinitako ingurune mitopoetikoa ikus daiteke.

Luzera: 7,5 Km. Iraupena: 3 Ordu.