Nekazal sektoreari dagokionean, Arau Subsidiario hauen berrikuskatzean landa-lurra bere horretan mantentzea izan da helburua, bestelako erabileretarako azalera oso txikiak izendatuz, modu honetan, gaur egun indarrean dauden eta etorkizunean egon daitezkeen nekazal jardueren garapena bermatuz.

Industria alorrean, Zubikoeta eta Otadi Zelai tarteko industrigunea ia garatu delarik, Sastegi azpiko zelaian beste industrigune bat aurreikusi da 20.561 metro karratutako lur-azaleran 10.553 metro karratutako aprobetxamendua aurreikusiz. Bestalde, ur-botilaratze enpresa baterako asmo baten aurrean, Aitzarterreka ondoan, Imatzene parean, lur ez-urbanizagarri edo landa-lurrean industri ez kutsagarrientzako erabilera ahalbideratzen den 37.000 metro karratutako azalera dago izendatuta.

Turismoa da Ataunen garapenik izan ez duen sektorea eta Arau aldaketa honekin ahalbideratu nahi dena, Ataunek duen kultur eta natur ondareaz baliatuz. Zentzu honetan Joxemiel Barandiaran kultur parkearen garapena bermatzeko Sara etxearen inguruko lurrak gorde dira, era berean Sara etxea bera ere babestuta geldituz. Bestalde, turismo garapenerako lo-leku eskaintza osatzearren, bi ekimen daude aurreikusiak. Alde batetik, Marumendiko zelaitik eskuinera hartu eta bidez goenetik dagoen Udalaren pinudian bordez osatutako ostalaritza erabilera baimentzen deneko 10 hektarea inguruko azalera finkatu da. Bestalde, bainuetxe izan zen Erremedio etorkizunean ere bainuetxe edo antzeko zerbait izan dadin ahalbideratu da Arauetan.

< Itzuli