Herritarrek izan ditzaketen behar eta eskaera ezberdinei erantzun nahi izan zaie modu honetan, eta etxebizitza Ataunen edonorentzat eskuragarri izan dadin hainbat gune babes ofizialeko etxebizitzak egiteko izendatu dira.

San Martinen, erdigunean etxebizitza anitzeko etxeak aurreikusi dira, gehienez ere behe solairua gehi 3 solairukoak. Ingurunean aldiz, bai Iztator aldean eta baita hilerri bidean ere, etxebizitza bakar edo biko etxeak, lehendik ziren adosatu egiturak bazterrera utziz.

Astigarraga, aurreko arauetan landa-lurra zen eta orain berriz hiri-lurra izango da. Bertan etxebizitza bakar eta biko etxe berriak aurreikusi dira, auzoaren atzealdean.

Arrondon aldiz, Arau Subsidiarioetan egin berri den aldaketa errespetatu da. Aldaketa horretan adosatu egiturako etxebizitzak kendu eta etxebizitza bakar eta biko etxeak aurreikusi ziren auzoak gaur egun dituen etxeen arteko hutsunetan.

Arinberriagan ere, Arau Subsidiarioetan egin berri den aldaketa errespetatu da. Landa-auzo izendapena du eta modu honetako auzoek izan dezaketen garapena aurreikusi da: Lehendik dauden etxe kopurua bikoiztera iritsi gabe egitura bereko etxeak gaur egungo etxeen inguruan.

San Gregorion, etxebizitza anitzeko etxe gehiago egiteko aukerarik ez zen gaurko Arauetan eta behar horri erantzunez 3 gune berri izendatu dira horretarako. Etxebizitza bakar eta biko etxe berriak hilerrirako bide inguruan aurreikusi dira.

Ergoienan ere, Arau Subsidiarioetan egin berri den aldaketa errespetatu da. Honek ere landa-auzo izendapena du eta lehengo etxeen inguruan etxebizitza bakar eta biko etxeak aurreikusiak daude.

Aian berriz, etxebizitza bakar eta bikoak aurreikusi dira Felipene eta Bikarioetxe eta Erroipe artean.

< Itzuli